የኢትዮጵያን ወቅታዊ ሁኔታ አስመልክቶ ከኦሮሞ ዲሞክራሲያዊ ግንባር ማዕከላዊ ኮሚቴ የተሰጠ መግለጫና የቀረበ ጥሪ

የኦሮሞ ዲሞክራሲያዊ ግንባር (ኦዲግ) ማዕከላዊ ኮሚቴ ስብሰባ ከሐምሌ 22 – 28 2008 ዓመተ ምህረት ድረስ ተካሂዷል፡፡ ይህን የአሁኑን የማዕከላዊ ኮሚቴ ስብሰባ ልዩ የሚያደርገዉ የኦሮሞ ሕዝብ በመላዉ ኦሮሚያ በሚያስደንቅ የአንድነት፣ የቆራጥነትና የጀግንነት ስሜት እያካሄደ ያለዉንና ለዘጠኝ ወራት የዘለቀዉን የነፃነት፣ የዲሞክራሲ፣ የእኩልነት፣ የሰብዓዊ መብት እና ራሱን በራሱ የማስተዳደር ጥያቄዎቹን እጅግ አጠናክሮ በቀጠለበት ታሪካዊ ወቅት የተካሄደ መሆኑ ነዉ፡፡ የኦዲግ ማዕከላዊ ኮሚቴ አባላት በመላዉ ኦሮሚያ የሚካሄደዉ ሰላማዊ የሕዝብ ተቃዉሞ በገዢዉ ቡድን የተደረጉበትንና የሚደረጉበትን አስከፊ ጫናዎችና የመሣሪያ አፈናዎች ሁሉ ተቋቁሞ ወደ ከፍተኛ ደረጃ እየተሸጋገረና በተለያዩ የአገሪቱ ክፍሎች የሚገኙ ሌሎች ኢትዮጵያዉያን ወገኖቹንም ለተመሣሣይ ትግል እያነሣሣ መሆኑን በአድናቆት እንመለከታለን፤ በሚቻለን መንገድ ሁሉም ለሰላማዊ ትግሉ ድጋፍ ለመስጠት ያለንን ቁርጠኝነት ደግመን ደጋግመን እናረጋግጣለን፡፡ ሕዝባችን የጠየቃቸዉን የዲሞክራሲ መብቶች ሙሉ በሙሉ እስኪጎናፀፍ ድረስ የተቃዉሞ እንቅስቃሴዉን አጠናክሮ እንደቀጥልም ልናበረታታዉ እንወዳለን፡፡

የኦሮሞ ዲሞክራሲያዊ ግንባር ማዕከላዊ ኮሚቴ ሰፊ ጊዜ በመዉሰድ ወቅታዊዉን የአገራችንን ሁኔታ በአጠቃላይ በመላዉ ኦሮሚያ እየተካሄደ ያለዉን ታሪካዊ የሆነ ሕዝባዊ የተቃዉሞ እንቅስቃሴ ደግሞ በተለይ እንደሚከተለዉ ገምግሟል፤

የኦሮሞ ሕዝብን ሰላማዊ የተቃዉሞ እንቅስቃሴ በተመለከተ፡-
 
በሕዝባዊ ወያኔ ሐርነት ትግራይ (ህወሐት) የሚመራዉ የኢሕአዴግ መንግሥት ላለፉት ሃያ-አምስት ዓመታት በብቸኝነት ሥልጣን ይዞ ቢቆይም ወይ ትክክለኛ ዲሞክራሲያዊ ሥርዓት በአገሪቱ እንዲሰፍን አላደረገም፤ ወይንም ደግሞ ጧትና ማታ የሚመፃደቅበትን ልማትና ዕድገት አስገኝቶ ሕዝባችንን ከአስከፊ የድህነት ኑሮ ለማላቀቅ አልቻለም፡፡ ይልቁንም የሥርዓቱ የግፍና የጭቆና ድርጊቶች ከጊዜ ወደጊዜ እየተባባሱ በመምጣታቸዉና በአገሪቱ የሰፈነዉ የሕዝቦች ድህነት፣ መከራና ስቃይ ከምን ጊዜዉም በላይ እየከፋ በመምጣቱ የኢሕአዴግ የአገዛዝ ሥርዓት የመፈናቀል፣ የረሃብ፣ የስደት፣ የዘወትር ስጋት፣ የጉስቅልናና የአስከፊ ድህነት መገለጫ ሥርዓት ሆኗል፡፡ እንደሚታወቀዉ የኦሮሞን ሕዝብ ለተጠናከረና ካለማቋረጥ ለረዥም ጊዜ ለዘለቀ ሰላማዊ የአመፅ እንቅስቃሴ ያነሣሣዉ ይህ ከልክ ያለፈ የኢሕአዴግ የግፍ አገዛዝ ሥርዓት ነዉ፡፡ የህወሐት/ኢሕአዴግ ሥርዓት በፈጠራቸዉ ችግሮች የተጎዳዉና ግንባር ቀደም ተጠቂ የሆነዉ የኦሮሞ ሕዝብ ብቻ ባለመሆኑም የተቃዉሞ እንቅስቃሴዉ ወደተለያዩ የአገራችን ክልሎች በመስፋፋት አገር-አቀፍ አመፅ ከመሆን ደረጃ ላይ እየደረሰ ይገኛል፡፡ ሕዝባዊ ተቃዉሞዉ በኦሮሚያ ክልል ተጠናክሮ በመቀጠል ወደሌሎች የአገራችን ክፍሎችም ቢስፋፋም ከገዢዉ ቡድን የሚሰጠዉ መልስ እንደተለመደዉ በጉልበትና በጦር መሣሪያ ለማፈን ከመሞከር ያለፈ ሆኖ አልታየም፡፡ የሕዝብን ስቃይና መከራ ለማስወገድ ሳይሆን ለራሳቸዉ ድሎትና ለተሠማሩበት የሕዝብ ሀብት ዝርፊያ ብቻ ቅድሚያ የሚሠጡት የገዢዉ ቡድን ቁንጮዎች ግን ለሕዝባችን ጥያቆዎች ተገቢዉን መልስ መስጠት አልቻሉም ወይም አልፈለጉም፡፡ ይልቁንም እስከአፍንጫዉ የታጠቀና ወገንተኝነቱን ለሕዝቡ ሳይሆን ለገዢዉ ቡድን ብቻ ያደረገ ገዳይና ጨፍጫፊ ሠራዊት አሠማርተዉ የብዙ ሺህዎችን ደም ማፍሰስ፣ የብዙ መቶዎችን ሕይወት ማጥፋትና በብዙ ሺህዎች የሚቆጠሩትን ደግሞ በጅምላ እስር ቤት ማጎርን እንደመፍትሄ አድርገዉ ወስደዋል፡፡ ይህ የገዢዉ ቡድን ጭፍንነት ደግሞ ሕዝባችን በልበ-ሙሉነት የጀመረዉንና በሚያስደንቅ ቆራጥነት ላለፉት ዘጠኝ ወራት ያካሄደዉን ሰላማዊ የተቃዉሞ እንቅስቃሴ አጠናክሮ እንዲቀጥል እየደረገዉ ስለሆነ በዚያች አገር የመንግሥት ሥርዓት ለዉጥ መምጣቱ አይቀሬ መሆኑን ያረጋገጠ ሂደት ሆኗል፡፡ ስለሆነም የኦሮሞን ሕዝብ በርታ፣ ሰላማዊ የተቃዉሞ ትግልህን አጠናክረህ ቀጥል፣ እኛም በተቻለን ሁሉ ከጎንህ ነን፤ በገዢዉ ቡድን “የከፋፍሎ መግዛት” ዕኩይ ፖሊሲ ተታለህ ከሌሎች ኢትዮጵያዉያን ወገኖችህ ጋር ምንም ዓይነት አለአስፈላጊ ቅራኔ ዉስጥ ላለመግባት እስከአሁን እንዳደረከዉ ሁሉ ለወደፊቱም ተገቢዉን ጥንቃቄ ሁሉ አድርግ እንላለን፡፡

የጎንደርን ሕዝብ የተቃዉሞ እንቅስቃሴ በተመለከተ፡-
 
ከዘጠኝ ወራት በፊት በመላዉ ኦሮሚያ የተቀጣጠለዉ ሕዝባዊ የተቃዉሞ እንቅስቃሴ በአገራችን ትክክለኛ ዲሞክራሲያዊ ሥርዓት ለማምጣት በሚካሄደዉ ሕዝባዊ ትግል ዉስጥ የኦሮሞ ሕዝብ ግንባር-ቀደም ሥፍራ እንዲይዝ ከማድረጉም በላይ ለሌሎች ኢትዮጵያዉያን ወገኖቹም በጥሩ አርዓያነት የሚታይ ስለሆነ የተለያዩ ሕዝባዊ የተቃዉሞ እንቅስቃሴዎች በተለያዩ የአገራችን ክፍሎች እንዲቀጣጠሉ ምክንያት ሆኗል፡፡ ጎንደር ዉስጥ በቅርቡ የተጀመረዉ ሕዝባዊ እንቅስቃሴም ለሕዝብ ፍላጎትና ምርጫ ተገዢ የሆነና ለመብት ጥያቄዎች ተገቢ የሆነ አፋጣኝ መልስ የሚሠጥ ትክክለኛ ዲሞክራሲያዊ ሥርዓት ለማምጣት እየተደረጉ ያሉ ሕዝባዊ እንቅስቃሴዎች አካል ነዉ፡፡ የጎንደርን ሕዝብ ጥያቄ ታሪካዊ ከሚያደርጉትና የሌሎች የኢትዮጵያ ሕዝቦች ሰላማዊ የመብት ትግል አካል መሆኑን ከሚያረጋግጡት እርምጃዎች አንዱ ጀግናዉ የጎንደር ሕዝብ ከመነሻዉ በኦሮሞ ወገኖቹ ላይ በገዢዉ ቡድን የተወሰደዉን ኢሰብዓዊ እርምጃ ማዉገዙና የፈሰሰዉ የኦሮሞ ሕዝብ ደም ደሙ፣ ያለፈዉ የኦሮሞ ታጋዮች ሕይወትም ሕይወቱ መሆኑን መግለፁ፤ የኦሮሞ ሕዝብ ጥያቄም የራሱ ጥያቄ አካል መሆኑን በማያሻማ ሁኔታ ማረጋገጡ ነዉ፡፡ የዚህ ዓይነቱ የሕዝቦች የትግል አንድነትና አጋርነት በሰላማዊ ሕዝባዊ አመፅ አማካይነት መገለፅ ሕዝባችንን ከምን ጊዜዉም በላይ በተጠናከረ መንገድ ከማስተሣሠሩም በላይ የተጀመረዉ ሕዝባዊ የተቃዉሞ እንቅስቃሴ ተጠናክሮ በሁሉም የኢትዮጵያ ማዕዘናት እንዲስፋፋ የሚያደርግ በመሆኑ የጎንደርን ሕዝብ ሰላማዊ የሆነ የዲሞክራሲ ትግል እጅግ ታሪካዊና የሚመሰገን ጅምር ያደርገዋል፡፡ እኛ የኦሮሞ ዲሞክራሲያዊ ግንባር ማዕከላዊ ኮሚቴ አባላትም ለጀግናዉ የጎንደር ሕዝብ እንቅስቃሴ ያለንን ልባዊ አድናቆትና አክብሮት እየገለፅን የተጀመረዉ ሰላማዊ የአመፅ እንቅስቃሴ ሕዝቡ የሚፈልገዉን ዉጤት እስኪያስገኝ ድረስ በሚቻለን ሁሉ ከጎኑ እንቆማለን፡፡ በዚህ አጋጣሚም ነፃነት፣ እኩልነትና ዲሞክራሲን ናፋቂ የሆናችሁ የኢትዮጵያ ሕዝቦች በሕወሐት/ኢሕአዴግ የከፋፍለህ ግዛ ፖሊሲ ሳትዘናጉ በጋራ በመቆም ይህን የሁሉም ችግሮቻችን ምንጭ የሆነዉን ጨቋኝ ሥርዓት ከሥሩ ለመገርሰስና በሥርዓቱ ጭፍን አከሄድ ምክንያት የተፈጠሩት ዘርፈ-ብዙ ችግሮች በሕዝባዊ ትግል ተወግደዉ ወደማይቀርላቸዉ መቃብር እንዲወርዱ ለማድረግ ከምንጊዜዉም በላይ እንድትተባበሩና በአንድነት እንድትቆሙ ወገናዊ ጥሪያችንን እናቀርብላችኋለን፡፡

አገር-አቀፍ የፖለቲካ ድርጅቶች ህብረት መመሥረትን በሚመለከት፡-
 
የኦዲግ ማዕከላዊ ኮሚቴ ከተለያዩ ተቃዋሚ የፖለቲካ ድርጅቶች ጋር ትብብር ለመመሥረት ይቻል ዘንድ በድርጅቱ የሥራ አስፈፃሚ አካል የተደረጉትን ጥረቶችና የተገኙትን አበረታች ዉጤቶች በጥልቀት ገምግሟል፡፡ እስከአሁን የተደረጉት ጥረቶችና የተገኙትም ዉጤቶች አበረታች ብቻ ሳይሆኑ ወደምንፈልገዉ ዲሞክራሲያዊ ሥርዓት ለመረማመድ ተስፋ ሰጪዎችም ናቸዉ፡፡ ስለሆነም የድርጅታችን የሥራ አሰፈፃሚ ኮሚቴ የተጀመሩትን ጥረቶች አጠናክሮ እንዲቀጥል፣ በአገር ዉስጥ እየተካሄዱ ያሉት ሰላማዊ የተቃዉሞ እንቅስቃሴዎች ተጠናክረዉ እንዲቀጥሉ ለማድረግ ይቻል ዘንድም የተጀመረዉን ከልዩ ልዩ የፖለቲካ ድርጅች ጋር ትብብር ለመመሥረት ያስቻለ ጥረት የበለጠ በማስፋትም አንድ ጠንካራ ኢትዮጵያ-አቀፍ የተቃዋሚ ኃይሎች ህብረት ለመመሥረት የሚያስችሉ እርምጃዎችን እንዲወስድ ሙሉ ኃላፊነት ሰጥተነዋል፡፡ ትክክለኛ ዲሞክራሲያዊ ሥርዓትን በኢትዮጵያ ዕዉን ለማድረግ በተለያዩ መንገዶች ትግል እያካሄዱ ያሉትን ተቃዋሚ የፖለቲካ ድርጅቶች ያሰባሰበ አንድ አገር-አቀፍ የተቃዋሚዎች ትብብር በአስቸኳይ መመሥረት እየተካሄደ ያለዉን ሕዝባዊ ተቃዉሞ የበለጠ ለማጠናከርና ለትግሉ የተማከለ የፖለቲካ አመራር ለመስጠት ከማስቻሉም በላይ የሕወሐት/ኢሕአዴግ መዉደቅ አይቀሬ በመሆኑ ለሰላማዊ ዲሞክራሲያዊ ሽግግር መሠረት ለመጣልም እጅግ በጣም አስፈላጊ ነዉ፡፡

ሰፊ መሠረት ያለዉና አገር-አቀፍ የሆነ የተቃዋሚ ድርጅቶች ህብረት ለመመሥረት ይቻል ዘንድ በኦሮሞ ዲሞክራሲያዊ ግንባር በኩል ረዥም ጊዜ የወሰዱ ተስፋ ሰጪ እንቅስቃሴዎች ሲደረጉ የቆዩ ሲሆን የእነዚህ እንቅስቃሴዎችና ጥረቶች ዉጤትም በቅርብ ጊዜ ለመላዉ የኢትዮጵያ ሕዝቦች ይፋ እንደሚደረግ ስናበስር ከፍተኛ ደስታ ይሰማናል፡፡ በዚህ አጋጣሚም የኢትዮጵያ ጉዳይ ይመለከተናል የምትሉ ድርጅቶች ሁሉ አሁን አገር ዉስጥ እየተካሄዱ ያሉትን ሕዝባዊ እንቅስቃሴዎች በቅርበት እንድትከታተሉና የሕወሐት/ኢሕአዴግን በሕዝባዊ ትግል መዉደቅ ተከትሎ ሊፈጠር የሚችለዉን ክፍተት ለመሙላትና አገራችን ወደአስከፊ ብጥብጥና ደም መፋሰስ እንዳትገባ ለማድረግ እንዲቻል እየተፈጠረ ወዳለዉ አገር-አቀፍ የፖለቲካ ድርጅቶች ህብረት በመምጣት የበኩላችሁን አስተዋፅኦ እንድታደርጉ ወገናዊ ጥሪያችንን እናቀርብላችኋለን፡፡

እንደ ኦዲግ እምነት የኢትዮጵያ መንግሥት ተቃዋሚ ኃይሎች ልዩነቶቻችንን አቻችለን በሚያግባቡን ዓላማዎች ሥር ብንሰባሰብና የተባበረ ትግል ማካሄድ ብንችል ያለምንም ጥርጥር እናሸንፋለን፤ እንደ የእስከአሁኑ አካሄዳችን የየራሳችንን መንገድ ብቻ ተከትለን በተበታተነ ሁኔታ እንቀጥል የምንል ከሆነ ግን መሸነፍ ብቻ ሳይሆን እንታገልለታለን የምንለዉን ሕዝብም ሆነ የጋራ ቤታችን ናት የምንላትን አገር ለከፋ ችግር እንዳርጋለን፡፡ ይህ ደግሞ ሁላችንንም የታሪክ ተጠያቂ እንድንሆን ያደርገናል፡፡ ከላይ እንዳልነዉ የሕወሐት/ኢሕአዴግ አገዛዝ መዉደቅ አይቀሬ ነዉ፡፡ አሁን ያለዉ ጥያቄ “የሕወሐት/ኢሕአዴግ መንግሥት ይወድቅ ይሆን?” የሚል ሳይሆን “መቼ ይወድቃል?” የሚለዉ ነዉ፡፡ በኦሮሚያ ተጀምሮ በተለያዩ የአገሪቱ ክፍሎች እየተስፋፋ ያለዉ ሕዝባዊ አመፅ ተጠናክሮ ከቀጠለ የዚህ ግፈኛ ሥርዓት መዉደቂያ ጊዜ ረዥም ስለማይሆን ይህን የታሪክ አጋጣሚ በሚገባ ለመጠቀም መዘጋጀት ይኖርብናል፡፡

ሁላችንም እንደምናስታዉሰዉ በአገራችን እንዲገነባ የምንፈልገዉን ዓይነት እዉነተኛ ዲሞክራሲያዊ ሥርዓት ለመገንባት ያስችሉ የነበሩ ብዙ የታሪክ አጋጣሚዎች አምልጠዉናል፡፡ በሕዝቦቻችን የደምና የሕይወት መስዋዕትነት የምንፈልገዉን ለዉጥ ሊያመጣ የተቃረበዉ ይህ የአሁኑ የታሪክ አጋጣሚ ግን በምንም ዓይነት መንገድ ሊያመልጠን አይገባም፡፡ ስለሆነም የኢትዮጵያ ጉዳይ ይመለከተናል የምንል ኃይሎች ሁሉ ጥቃቅን ልዩነቶቻችንን ወደጎን በመተዉ ተቀራርበን በመነጋገር በሚያስማሙን ጉዳዮቸ ላይ በጋራ ለመታገልና የሕዝባችንን መስዋዕትነት ፍሬያማ ለማድረግ የሚያስችሉንን ወሳኝ እርምጃዎች እንድንወስድ አጥብቀን እንጠይቃለን፡፡

የዓለም አቀፉን ማህበረሰብ በተመለከተ፡-
 
የኦዲግ ማዕከላዊ ኮሚቴ የዓለም አቀፍ ማህበረሰብ አባላት ለሕወሐት መራሹ የኢትዮጵያ ጨቋኝና ኢ-ዲሞክራሲያዊ መንግሥት የሚያደርጉትን የገንዘብም ሆነ የወታደራዊ መሣሪያዎች እርዳታ እንዲያቆሙ አጥብቆ ይጠይል፡፡ በተደጋጋሚ እንደታየዉ ሕወሐት መራሹ የኢትዮጵያ አምባገነን አገዛዝ በአገር ዉስጥ ምንም ዓይነት ሕዝባዊ መሠረትም ሆነ የሕዝብ ድጋፍ ስለሌለዉ በስልጣን ላይ ለመቆየት የሚያስችለዉን የገንዘብም ሆነ የወታደራዊ መሣሪያዎች ድጋፍ የሚያገኘዉ የአሜሪካን መንግሥት ጨምሮ ፅንፈኝነትን ለመዋጋት የአፍሪካ ቀንድ አካባቢን ትብብር ከሚፈልጉ የዓለም-አቀፍ ማህበረሰብ አባላት ነዉ፡፡ የአሜሪካ መንግሥትም ሆነ ሌሎች የምዕራብ አገራት መንግሥታት መገንዘብ ያለባቸዉ ከኢትዮጵያ ሕዝብ ጋር መቆም ሲገባቸዉ ከአምባገነን ጨቋኝ ገዢዎች ጋር በመቆም በየአገሮቻቸዉ የሚያራምዱትንና የሚያምኑበትን የዲሞክራሲ ሥርዓት እየተቃረኑ መሆናቸዉን ነዉ፡፡ ለዚህ ጨቋኝና አምባገነን መንግሥት የሚሠጡት ማንኛዉም ድጋፍም የአፍሪካ ቀንድ አካባቢን ሰላምና ፀጥታ ችግር ላይ የሚጥል መሆኑን ተገንዝበዉ ድጋፋቸዉን ለሕዝብ ቢያደርጉ በዚያ አካባቢ እንዲኖር የሚፈልጉትን ሰላምና ፀጥታ ዘላቂነት ባለዉ ሁኔታ ሊያረጋግጡ ይችላሉ፡፡ በተለይም የአሜሪካ መንግሥት ምንም ዓይነት የሕዝብ ድጋፍም ሆነ ተቀባይነት ከሌለዉ ከአምባገነኑ ሕወሐት መራሽ የኢሕአዴግ መንግሥት ጋር በመተባበር የራሱን የረዥም ጊዜ የሰላምና የፀጥታ ፍላጎት ለአደጋ ከመዳረግ ይልቅ የኢሕአዴግ መንግሥት ለሕዝቡ የዲሞክራሲ፣ የነፃነትና የሰብዓዊ መብት ጥያቄዎች ተገቢዉን መልስ እንዲሰጥ ጫና በማድረግ ከኢትዮጵያ ሕዝብ ጋር መቆም ይኖርበታል፡፡

በተደጋጋሚ እንደታየዉ ሕወሐት/ኢሕአዴግ የሚያዳምጠዉ አስተዳድረዋለሁ የሚለዉን ሕዝብ የልብ ትርታና የመብት ጥያቄ ሳይሆን የገንዘብም ሆነ የመሣሪያ ትራፊ የሚወረዉሩለትን ምዕራባዉያን መንግሥታት ስለሆነ የአሜሪካ መንግሥትና ሌሎች ምዕራባዉያን መንግሥታት የገንዘብና የወታደራዊ መሣሪያ ዕርዳታ በመስጠት ሕዝባችንን ከማስረገጥ ይልቅ በሥርዓቱ ዘንድ ያላቸዉን ተሰሚነት ተጠቅመዉ ገዢዉ ቡድን ለሕዝቡ ጥያቄዎች ተገቢ የሆኑ መልሶችን በአስቸኳይ እንዲሰጥ ጫና ሊያደርጉበት ይገባል፡፡ ለሕወሐት/ኢሕአዴግ መንግሥት ከአሜሪካም ሆነ ከሌሎች ምዕራባዉያን መንግሥታት የሚሰጠዉ የገንዘብም ሆነ የወታደራዊ መሣሪያ ዕርዳታም በጥንቃቄ መመርመር ይኖርበታል፡፡ ምክንያቱም የሚሰጠዉ የገንዘብም ሆነ የመሣሪያ እገዛ ገዢዉን ቡድን አጠናክሮ የኢትዮጵያን ሕዝብ ስቃይና መከራ ከማራዘም ዉጭ ለሕዝቡ የሚጠቅመዉ ነገር ስለሌለ ነዉ፡፡ ሰለሆነም ምናልባት ለተራቡ ወገኖቻችን የሚሠጥ የነፍስ ማዳን ዕርዳታ ካልሆነ በስተቀር አሁን በሥልጣን ላይ ላለዉ የኢትዮጵያ መንግሥት የሚሠጥ ማንኛዉም የገንዘብም ሆነ የመሣሪያ ዕርዳታ በአስቸኳይ እንዲቆም ጥሪያችንን እናቀርባለን፡፡

ፍትህና ነፃነት ለሁሉም ሕዝቦች!

የኦሮሞ ዲሞክራሲያዊ ግንባር ማዕከላዊ ኮሚቴ
ሐምሌ 28 ቀን 2008 ዓ. ም.